Letter to God: Lord, let them leave my learned friend small na

Dear Father:

They say everybody just on my man back ooh. Can you imagine since ley man went and put him mouth on ley people at ley Palava Hut, him life has not been easy.

They say da whatin him do?

Father, ley man say why ley elder them at ley Palava Hut mon say, ley thin ley chief them from ley Traditional Council doing ay wrong. Him say da bad example there so. Him say, how they will talk da kina thin, when ley Rebel them pass ley ingredients for ley Village cake, da ley elder them are eating their own-no noise.

Him say, if they say it leh da, den they mon bring their owner cake back, since ley Rebel them who fixed it na have ley right to fix it.

Hmm, my son, ley thing your friend talky small sense inside oo.

Yes, oo Father, my learned friend say da bad example ley people from ley Palava Hut na set so. Him say why they mon say all ley thing them ley rebel chief them doing at tey Traditional Council bad, den they mon bring their share of ley cake back. Da ley fire ley man put in ley hole so oo.

Um, my son, you sure nathin behind this whole thin here.

Aah, Father my name ooh. Bor I hear say small money bisnay inside oo.

You say whatin!

Aah, Father, da ley reason iI na wan talk for ooh. You know dis whole wahala here da so, so money bisnay inside. Ehn you remember da chief from ley borough –“You eat, I eat” and ley other one I will see what to do.”

Hmm, ley people them.

Yes, oo Father, ehn da them there they just chopping our village money leh da. All ley noise on da Hill, particularly to da Traditional Council there da so, so money bisnay.

Father, ley people money bisnay too strong leh goat peppe. And all da thing den they doing so ley suffering da inside dis village here ay na easy.

Da small thin!

Yes, ooh Father, ay na easy in dis village here ooh, da only God manning us here oo. Imagine, people work no money to take pay.

Hmm, den you can just imainge ley people den who na doing nathin, just sitting down home.

So, da whatin ley Oldman doing na?

Father, da small fuel ley Papay putting inside ley fire. Ay na small fuel oo. All ley thing den ley Oldman used to be talking against, da ley thin dem him doin. In fact, even worse things.

Bor da who dem advising him so?

Father, who know to him? Him gat so, so him children around him, no good advice. They just want for their pockets and their girlfriend dem.

Bor we inside, ehn we say, we na wan short man, we side good, good. We just pray for God to continue manning us oo-ay na easy.